epub
 
Падключыць
слоўнікі

Цішка Гартны

Рвуся я

Галубку

 

Рвуся я ў даль, дзе сонца жыве

З жыццятворным светам сваім,

Дзе па небе ракою плыве

Іскракідная пройма агню.

 

Рвуся я ў тую сінюю даль,

Што хавае ў тумане усё:

Непрытомную радасць, і жаль,

І парывы-жаданні людзей.

 

Рвуся я з усёй сілы-змагі,

Бо здаецца жыццё толькі там,

Дзе не ціснуць яго берагі,

Дзе яго не паганіць нішто.

 

Рвуся я ў даль, дзе сонца жыве,

Дзе усходняе неба гарыць;

Яго свет мяне вабіць, заве,—

З гэтым светам я звязан душой.

 

1912




Крыніца: скан

Беларуская Палічка: http://knihi.com