epub
 
Падключыць
слоўнікі

Цішка Гартны

Сявец

Ўставай, сявец! бяры сяўню,

Аўса, вады давай у волю

Свайму ты вернаму каню

І ўжо рыхтуйся ехаць ў поле.

Прыйшла вясна, і там цябе

Чакае вызвеўшая ніва;

Яна гатовая к сяўбе

Й сяўца чакае ўжо рупліва.

За зіму ўспрэўшая зямля

Табе аддасць за працу многа!

Ўставай, сявец! Няхай сяўня

Не будзе пуста і убога.

Рукой зярнят бяры паўней

Ды кідай мерна жменя ў жменю;

Са збожжам ў сэрцы думкі сей

Надзеі, волі, адраджэння.

Ўставай, сявец! І тое знай,

Што думак глеба не абмане,

А дасць багаты ураджай

За пот праліты, за старанне.

Ўставай, сявец! Ідзі, ары

Здзярнелай нівы твае гоні;

Прыйшоў твой час — ужо пара

Пачаць сяўбу яшчэ сягоння!

 

Капыль, 1909




Крыніца: скан

Беларуская Палічка: http://knihi.com