epub
 
Падключыць
слоўнікі

Цішка Гартны

Ветру

Вей ты, вольны вецер,

Вей па чыстым полі

І шукай усюды

За мяне ты долі.

 

Праляці зямлёю

Скрозь па свеце белым

Ды шукай старанна,

Ды шукай умела.

 

Можа, яна блудзіць

Па лясах,

пустынях,

Збіўшыся з дарогі,

Ў пустках дзікіх гіне.

 

Можа, злыя людзі

Дзе яе стрымалі

І ў замкі з жалеза

Яе закавалі,

 

Ды яна не можа

Вырвацца на волю,—

Усё яе пільнуюць,

Не даюць патолі...

 

Вей жа,

вольны вецер,

Вей на свеце гэтым

І шукай мне долю

Ды шукай умела.

 

А калі дзе найдзеш,

Прывядзі з сабою,—

Я хаця на хвілю

Падзіўлюся ёю.

 

Пагляджу,

пабачу,

Што яна за дзіва,

Ці папраўдзе можна

З ёю жыць шчасліва.

 

А табе ж за гэта,

Вецер, адплачуся:

Перад тваёй моцай

Нізка пахінуся.

 

1912




Крыніца: скан

Беларуская Палічка: http://knihi.com