Мой браце, змагайся
З нядоляй, з бядою!
Ні крыўдзе не дайся,
Ні суму ў настроі!
Пакоры, цярпенню
Упарта спрачайся,
Да волі імкненнем
Гары — разгарайся.
Адважна заўсюды
Наперад дарогай
Праз ямы, праз груды
Вядзі з перамогай.
Адкрытыя ўзрокі —
У светлыя далі!
Хай бляск іх далёка
Разгойдае хвалі.
Ваяцкай адвагі,
Сталёвага гарту!
Балючыя скаргі
Раздуй у пажар ты.
Цярпення людскога
Ўскалышаш падпоры.
Жыццё там — дзе змога.
Дзе смерць — там пакора.
Пецярбург, 1913