Францішак Аляхновіч (1883–1944) – выдатны дзеяч беларускага адраджэння, паэт, акцёр, рэжысёр, першы беларускі тэатразнаўца, аўтар шэрагу драм, большасць якіх напісана паводле фальклорных сюжэтаў. Яго творам уласцівы востры сацыяльны змест і дэмакратызм, займальнасць інтрыгі, дынамізм дзеяння і выразнасць мовы.
Сатырычная камедыя “Пан міністар” – бліскучая палітычная сатыра на псеўдабеларускіх дзеячаў. Яна была напісана напярэдадні выбараў дэпутатаў у польскі Сойм і мела актуальны канкрэтны змест. Жаданне галоўнага героя завалодаць партфелем міністра фінансаў і хітрыкі, на якія пускаецца герой, – вядучая сюжэтная лінія. П’еса створана ў класічным стылі, развенчвае тых, хто, адчуўшы перамены ў грамадстве, спрабуе выкарыстаць палітычную кан’юнктуру.