epub
 
Падключыць
слоўнікі

Францішак Багушэвіч

Новы 1886 год

Прамінай жа, годзе шэры,

Забяры свае падзеі!

Ты найперш абдзёр нас з Веры,

Ты не даў нам і Надзеі.

 

Звёў Любоў... а ідэалы

Паказаў у бойцы браццяў!

Спраў тваіх тут больш не стала,

Каб цябе й не ўспамінаць нам!

 

Слёзы, роспач, невядомасць

У насмешак блытаніне, -

Вось уся твая маёмасць...

Хай і памяць аб ёй згіне!

 

Затані навекі, годзе,

Як слёз рэкі у народзе,

Без надзеі аб свабодзе,

Без ідэй для асяроддзя.

 

Вось ідзе ўжо прамяністы,

Ясны, свежы, як маёвы,

Дзень пагодны і ўрачысты,

Год бясконцы, Год наш Новы.

 

Нам прарочылі ўжо зоры,

Што надходзіць год шчаслівы!

Дык хадзі, хто бедны, хворы,

Дасць усё ён, каб жылі вы.

 

Якар - вось яго эмблема,

І Любоў у ім палае,

Крыж пакрыў забрала шлема

Ў знак, што веру ў сэрцы мае.

 

Ён любоўю ўсіх нас злучыць

І Свабоду нам уручыць.

Дасць надзею і здзяйсненне,

Крыжам збавіць ад сумненняў!..

 

«Крыж?.. Ці веры знак, ці мукі?»

«Веры крыж адлюстраванне!..»

«А навошта чара ў рукі?

Ці ж ілюзія падмане?..

Гэта ж той, што год за годам

Зноў пачне нас мімаходам

Выпрабоўваць!»

 



Пераклад: Пятро Бітэль

Беларуская Палічка: http://knihi.com