epub
 
падключыць
слоўнікі

Якуб Колас

Абаронцам роднай зямлі

У кожны міг, у кожны час

Душою, сэрцам я між вас,

 

  Браты мае, байцы-сябры,

Зямлі святой багатыры!

 

Вялік прастор, шырок прасцяг —

На сотні міль пралёг ваш шлях.

 

На тым шляху і ўдоўж, і ўшыр

Бурліць смяротны бой, як вір.

 

Тэўтон-бандыт, фашыст-удаў

Бандытаў полчышчы нагнаў.

  Ды пад навалай чорнай цьмы

Галоў сваіх не хілім мы.

 

І ўсё, што ў нас святога есць —

Радзіма, воля, слава, чэсць, —

 

Мы пранясём праз гром, агонь,

Варожых сіл раскрышым бронь.

 

Другіх дарог нам больш няма,

Сыноў жа цьмы агорне цьма.

 

Байцы-сыны, сябры, браты!

Мы выпаўнім наш доўг святы

 

І над раскутаю зямлёй

Узыдзем яснаю зарой.

 

Няхай вам свецяць сонца, дзень,

А ворагаў агорне цень!

 

2/Х 1941


02.10.1941

Тэкст падаецца паводле выдання: Якуб Колас. Т. 3 : Вершы, 1939―1945