Сышліся прэмʼеры,
Фашысты, бандыты,
У вузел спляліся адзін,
І ткуцца іх змовы
Праз чорныя ніты
Насупраць савецкіх краін.
Успенена мора,
Зямля ўзбунтавана,
І глуха віруюць віры.
Дзве хвалі, дзве плыні —
Варожыя станы:
Саветы і Захад стары.
Там крызіс лютуе,
Там крык безрабоцця —
Сістэма старая згніла.
Там побач з раскошай
Галеча, лахмоцце
І бездані цёмнай імгла.
Тут праца і творчасць,
І веліч разгону,
І яснасць пастаўленых мэт:
Змаганне ў імя
Вызвалення мільёнаў,
Каб сцерці прыгнечання след.
І блізіцца бура,
Бо круг іх замкнёны,
А разам — ім месца няма.
Апошні бой грымне, —
Той час неўнікнёны, —
Гусцее варожая цьма.
Дзве сілы, дзве плыні:
Стары свет і новы,
І нельга тут згоды чакаць.
Працоўныя, чуйце
І будзьце гатовы
Сусветны Кастрычнік спаткаць!
1932