Вас Ленін вялікі
Да працы заклікаў
І даў запавет:
Змагацца за волю,
За новую долю,
За новы наш свет.
Ён даў вашай сіле
Арліныя крыллі,
Адвагу вам даў,
Агонь негасімы
У сэрца закінуў
І шлях паказаў.
Прайшлі вёсны, прайшлі зімы
Трудныя гады,
І раслі, мужнелі КІМʼа,
Як граніт, рады.
Гартаваў ён сілу, волю
На франтах вайны,
На савецкім вырас полі
Цвет-краса буйны.
Сталін, бацька клапатлівы,
Думкай, сэрцам з ім...
Расцвітай жа, наша ніва,
І жыві, наш КІМ!
* * *
Краіна родная! Адна ты,
Адна ты ў свеце, як скала.
Твой чэсны сцяг высока ўзняты,
Як крыллі горнага арла.
І чуйна ты на варце міру
Стаіш, як грозны вартавы,
У бездань зрынуўшы куміра,
І не схіляеш галавы.
А час прабʼе, і голас брані
Пачуеш ты каля граніц,
Твае народы ўсе паўстануць
Гразою гнеўных бліскавіц.
Праз горы і хмары,
Праз снежную муць
Арлы-камсамольцы
Высока лятуць.
Іх зоркія вочы,
Адсветы зарніц,
Глядзяць, не прапусцяць
Ліхіх чужаніц.
На варце краіны, –
На сушы, ў марах, –
Байцы-камсамольцы
У першых радах.
У працы, у бітвах
Не гнецца іх стан,
Адвагу іх, волю
Засведчыў Хасан.
Вас Ленін заклікаў,
Вас Сталін вядзе.
Такіх сакалятаў
Не знойдзеш нідзе.
Няма перашкод вам,
Няма далячынь.
Вітаем герояў,
Дачок-гераінь!
23/Х 1938