epub
 
падключыць
слоўнікі

Якуб Колас

Да трыццацігоддзя Кастрычніка

Як хвалі шырокага мора,

Плывуць нашай славы гады,

І сонца ў іх ззяе, і зоры,

І далечаў новых прасторы,

І сілы разгон малады.

 

Хто спыніць раскутыя сілы?

Хто праўды патушыць агні?

Скірован наш лёт быстракрылы

Ад цемры, ад ночы магілы

          У ясныя далі і дні.

 

Савецкі наш край! Ты праз громы

Прайшоў, не панік галавой.

Як волат, яшчэ невядомы,

Над светам, не знаючы ўтомы,

Паўстаў ты гранітнай скалой.

 

Стаіш, непадкупны і смелы,

На варце законаў людскіх,

Каб праўда, як сонца, гарэла –

За шчасце, за правае дзела

          Народаў бяспраўных, малых.

 

Твой голас ніхто не заглушыць:

Ні зграі прадажных пісак,

Ні лордаў двурушныя душы...

Не! Сонца асліныя вушы

Сабой не заслоняць ніяк!

 

Мы Леніна праўдаю дужы,

Мы Сталіна воляй цвярды,

Народам і міру мы служым,

Пранёсшы праз буры і сцюжы

          Наш сцяг баявы, малады,

 

Красуйся ж ты вечныя годы,

Наш край, малады багатыр!

Чэсць, слава савецкім народам,

Іх творчым узлётам, паходам!

Хвала табе, наш правадыр!

 

[да 6 лістапада 1947]

 

[1947]


[1947]

Тэкст падаецца паводле выдання: Якуб Колас. Т. 4