epub
 
падключыць
слоўнікі

Якуб Колас

Да зброі за волю!

Ачніцеся, людзі, ад доўгага сну,

Зніміце павязку з вачэй.

Даволі цярпець вам няпраўду, ману,

Паіць сваёй кроўю чарвей!

Даволі насіць вам на целе сваім

Крывавыя язвіны скул,

Ускіньце плячамі, развейце, як дым,

        Малых і вялікіх акул.

Скідайце скрыпучы, іржавы ланцуг,

        Пракляцце і кару вякоў!

Даволі вам гнуцца у постаці слуг

Для прагных сваіх павукоў.

Вас кінулі ў бездань знішчэння, пакут

Насільнікі вашы, лгуны,

Каяндры і эркі. Няхай жа свой бруд

Зальюць сваёй кроўю яны.

Дык смела ж наперад — у грозны паход!

        Свабода к вам стукае ў дом.

Да зброі за волю, фінляндскі народ,

        І кінь ім на голавы гром!

 

2/ХІІ 1939


02.12.1939

Тэкст падаецца паводле выдання: Якуб Колас. Т. 3 : Вершы, 1939―1945