epub
 
Падключыць
слоўнікі

Якуб Колас

Голас зямлі

Я чую голас несціханы —

Зямля мая мяне заве

І кроіць сэрца мне на раны,

Звініць, як звон касы ў траве.

 

І шум дубровы, і стогн пушчы,

І рэк усхліп, і плач крыніц,

І немы зрок балотнай тлушчы

Нясуць мне весць пра чужаніц.

 

Я бачу постаці тэўтонаў —

Халодны твар, звярыны від.

Не знае жалю, ні законаў

У сталь закованы капыт.

 

О, каб я меў такія рукі,

Зямля, абняў бы я цябе,

Каб сцішыць гора тваё, мукі

І сілу даць у барацьбе!

 

Зямля мая, мая краіна!

Я чую твой прызыўны звон.

Прымі ж хоць слова твайго сына —

Не доўгі будзе твой палон.

 

Шумяць гняўліва твае пушчы,

Трасуцца помстаю бары,

І дзень твой хмурны зрок расплюшчыць—

Ёсць у цябе багатыры!

 

31/ХІІ 1941


31.12.1941

Тэкст падаецца паводле выдання: Якуб Колас. Т. 3 : Вершы, 1939―1945

Беларуская Палічка: http://knihi.com