epub
 
падключыць
слоўнікі

Якуб Колас

Ім месца няма ў грамадзе!

Шалее фашысцкі падлюга,

Брыдзе па калені ў крыві,

Махае нямецкаю пугай

І піша загады — даві.

Дзе толькі ні пройдзе фельдфебель,

Там чорныя пусткі ляжаць,

І дым рассцілаецца ў небе,

І блекнуць палі, сенажаць.

 

Над светам, дзе мірныя людзі

Пракладваюць творчы свой шлях,

Сцяг свастыкі прускай паскудзе

Мільгаецца ў свінскіх вачах,

 

І лаўры спустошанай сцерве

Мярэшчацца ўночы і ўдзень,

Не чуе, не бачыць, як чэрві

Паўзуць на фашысцкую тлень.

 

Высока ўзносіцца ў марах,

У мыслях зладзейскіх бандыт,

Але дзе апусціць, пачвара,

Асліны нямецкі капыт?!

 

За межамі смродных падвалаў

Народная помста гудзе:

На эшафот цемрашалаў —

Ім месца няма ў грамадзе!

 

30/IV 1942


30.04.1942

Тэкст падаецца паводле выдання: Якуб Колас. Т. 3 : Вершы, 1939―1945