epub
 
падключыць
слоўнікі

Якуб Колас

Янка

Ідзе пʼяны Янка,

Тупае нагой,

Злосна ён скрыгіча

І крычыць — «Далой!..»

 

Пачуў Янку стражнік

Ды за ім ступой.

Янка ідзе далей

І крычыць — «Далой!..»

 

Стражніку ахвота

Янку ўзяць рукой,

Ўзяць бы, падказаў бы

Крыкнуць, што «далой»,

 

Ды не дурань Янка,

Ўладае сабой,

Гуркае праз зубы

І крычыць — «Далой!..»

 

Стражнік выцяг шыю,

Як бы бусел той,

– Ну, ну, кажы далей,

Што крычыш: «далой»?

Янка не шманае,

Круціць галавой:

– Не, не скажу, браце,

Што хачу «далой».

 

1908–1910


1908-1910

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910