epub
 
Падключыць
слоўнікі

Якуб Колас

Конь і сабака

(Са зборніка «Другое чытанне для дзяцей беларусаў»)

Свабодны конь гуляў на волі,

I хвост, і грыву распусціў,

Іржаннем ён сваім будзіў

I лес стары, і чыста поле.

 

У бок прахожы стараніўся,

Яму дарогу уступаў.

Ад страху Рудзька прытуліўся

I толькі ціхенька брахаў,

 

Каня злавілі, прывязалі,

На вобруць, беднага, ўзялі,

Аборкай ногі абвілі

I борзды бег яго стрымалі.

 

З-за вугла вылазіць Рудзька.

– Гаў-гаў-гаў! – давай брахаць.

За хвост каня кусае цюцька –

Ні адцягнуць, ні адагнаць!

 

Малыя дзеці тут гулялі,

Дзівілісь многа і казалі

(Па дурнаце не разабралі –

Дзіця малое, як ягня):

– А Рудзька дужшы за каня!

 

Красавік, 1907




Беларуская Палічка: http://knihi.com