epub
 
падключыць
слоўнікі

Якуб Колас

Краіне Саветаў

Адзванілі званы на званіцах,

І збуцвелі, паніклі крыжы,

Знакі цемры-імжы.

Новы край тут паўстаў з навальніцаў,

Забурлілі другія крыніцы

На шырокай савецкай мяжы.

У пустых дзірваністых абшарах

Патапельніц і багны балот

Дзівы робяцца ў год:

Ажываюць аблогі-імшары,

Загараюцца зоры-стажары,

Асвятляюць вялікі паход.

І спяваюць вятры-самагуды

Гучным звонам у струнах дратоў

На гітарах слупоў,

Што бягуць, як ганцы з Асінбуду,

Каб працоўнаму вольнаму люду

Прывітанне аддаць хоць без слоў.

Бурны рост. Цвёрды крок. Будаванне.

Зносяць межы ў палях трактары —

Новых дзён песняры:

Тут будуюць сваё бытаванне

У сімфоніі працы, змагання

Пралетары — зямлі ўладары!

Не пазнаць, Беларусь, цябе сёння!

Разагнуўся працоўны твой люд:

Грукат, шум, гоман, гуд...

Пакацілася ліха ў прадонне.

А калі ж ты, калі, Занямонне,

Адсвяткуеш свой дзень, як мы тут?

Дык дазволь жа і мне ты, краіна,

Прывітаць малады твой разгон,

Песню-быль, казку-сон.

А ваякам тваім, хто загінуў

За свабоду, працоўных айчыну,

Мой журботны і нізкі паклон.

 

[1930]


[1930]

Тэкст падаецца паводле выдання: Колас, Я. Збор твораў: у 20 т. Т. 2 : Вершы 1911―1938