— Гэй, мой конік! Гэй, мой сівы!
Ну яшчэ, маленькі!
Варушыся, гэй, не бойся,
Конік мой сівенькі! —
Зранку ў полі за сахою
Аратай гукае,
Сіўку, друга ў цяжкай працы,
Просіць-панукае.
Сам без шапкі, босы ногі,
Грудзіна раскрыта.
Бʼюць каменні аб нарогі,
Скрыгацяць сярдзіта.
І шуршаць пяскі буйныя,
Як жарства рачная;
Ходзіць подскакам, няроўна,
Сошачка крывая!
Аратай ідзе спавагу,
Мерна, крок за крокам,
Вузка доўгая палоска,
Не акінеш вокам.
Пройдзе боразну аратай,
Сошку патрасае,
Сам назад увесь падасца —
Конік службу знае:
Сам заходзіць, без панукі,
Без каманды, спраўна,
Аж нейк глянуць на сівога
Люба і забаўна.
Нібы знае сівы конік
Думкі аратая,
І яго панукі-крыку
Сіўка не чакае.
Завярнуўшыся, аратай
Спыніць друга-сіўку,
Слова добрае прамовіць
І паправіць грыўку.
Гладзіць коніка па шыі,
Мух дакучных гоніць,
Як бы з самым лепшым другам,
З сіваком гамоніць.
— Змардаваўся, адпачынь, брат,
Пастаім, пакурым.
Вератнік мы гэты скончым,
Спачываць патурым.
Конік трэцца галавою
Аб яго кашулю,
Адпачыўшы, зноў ён цягне
Сошачку-крывулю.
А аратай, задуменны,
Зноў ідзе ступою...
Моцна, моцна іх злучыла
Праца за сахою!
— Гэй, мой конік! Но, мой мілы! ––
Носіцца па полі.
Конік, сошка і аратай
Сунуцца паволі.
Эх ты, поле! Колькі сілы
Тут затраціць трэба!
Цяжка, цяжка дастаешся
Ты, кавалак хлеба!
22/V 1911