epub
 
падключыць
слоўнікі

Якуб Колас

На звера

К канцу падыходзіць дарога

Крыві і ярма.

Ад ярасці гневу людскога

Збавення няма.

 

Навокал разбойніка-звера

Змыкаецца круг,

І вострыцца помсты сякера,

Куецца ланцуг.

 

Няхай сатанее звяруга,

                Двуногі шакал, —

Не выйдзе з замкнёнага круга

Нямецкі капрал.

 

Узважаны дні яго, лёсы,

Ён лёгкі, як пыл:

Чарвяк не ўзлятае ў нябёсы,

Бо слеп і без крыл.

 

  Апусціцца грозна заслона,

Суд будзе суроў.

Пагібель яго неўнікнёна,

                За кроў аддасць кроў.

 

На звера ў паход, людзі-брацці!

Скідайце ярмо!

Мы імя забойцы пракляццю

Навек аддамо.

 

17/ХІ 1941


17.11.1941

Тэкст падаецца паводле выдання: Якуб Колас. Т. 3 : Вершы, 1939―1945