Дні беспрасвецця ў нябыт адышлі,
Сонца ўзыходзіць над краем.
Вольныя людзі раскутай зямлі,
Песняю вас мы вітаем.
Збіты кайданы чорнае ночы,
Сцёрты старыя скрыжалі.
Смела наперад, люд наш рабочы,
К шчасцю ў шырокія далі.
Выкуем долю ўласнай рукою —
Ласкі нам панскай не трэба:
Згодай народаў, дружбай святою
Возьмем зямлю мы і неба.
Паў арол прагны, пала граніца —
Сцежкі, дарогі раскрыты.
Хай жа засвеціць вам зараніца,
Сонцам дзянёк апавіты.
Хай жа тым ясным сонцам над намі
Сцяг перамогі лунае.
Дружна ж у ногу ўперад з братамі
Гайда, зямля маладая!
Хто нас разлучыць, дужых, зʼяднаных,
Шлях пралажыўшых да волі,
Пала няволя разам з панамі,
Пана не будзе тут болей.
Дні беспрасвецця ў нябыт адышлі,
Сонца ірдзіцца над краем.
Вольныя людзі раскутай зямлі,
Песняю вас мы вітаем.
25/Х 1939