epub
 
падключыць
слоўнікі

Якуб Колас

Напрадвесні

(Са зборніка «Другое чытанне для дзяцей беларусаў»)

Эх, наперла ліха-гора!

Ні сяніны, ні зярна.

А тут снег яшчэ не скора

Згоніць цёплая вясна.

 

У кішэні ні грашынкі,

Хата поўная дзятвы!

Ні паленца, ні лучынкі –

Хоць у землю лезь жывы.

 

Папалілі, пераелі, –

Нічагутка ані ў зуб!

Хлеба толькі да нядзелі,

На два разы ўсяго круп!

 

А даўгоў ты нахватаўся,

Таму дзесяць, таму пяць...

Ось дзе, Грышка, ты папаўся:

Чым ты будзеш аддаваць?

 

Эх, наперла ліха Грышку –

Рук няма за што зацяць!

Хіба выпʼем па кілішку –

Лягчэй будзе гараваць.

 

1906–1907


1906-1907

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910