epub
 
падключыць
слоўнікі

Якуб Колас

Наша возьме

Мы ходзім, спатыкаемся,

Бадзяемся, як пʼяныя,

Мы з голадам зрадніліся,

Худыя, абарваныя.

 

Асмеяны, аблаяны,

Гразёю мы замазаны.

Багатымі мы скрыўджаны,

Няволяю мы звязаны.

 

Ў балоты мы адціснуты,

Загнаны мы у шчыліны,

І вочы нам завязаны,

І вушы нам зачынены.

 

Адно мы добра ведаем:

Хоць вечна мы блукаемся,

А ўсё ж такі, хоць некалі,

А праўды дапытаемся.

 

[1907]


[1907]

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910