epub
 
падключыць
слоўнікі

Якуб Колас

Ноч

Між палёў шырокіх

Я адзін стаю,

Ахваціла ціша

Ўсю душу маю.

 

Ночанька мая ты,

Водблеск глыбіні!

Ты душу чаруеш

Спевам цішыні.

 

Многа ў гэтым спеве

  Водгукаў жывых,

Іх не зловіш вухам,

Чуеш сэрцам іх.

 

Ночанька мая ты,

Ціхі сон вясны!

Колькі зор на небе!

Як блішчаць яны!

 

Водблескам пажару

Неба край гарыць –

Там двурогі месяц

Выплыў з-за гары.

 

Ночанька мая ты,

Ціхая дума!

Не ахваціш вокам,

І тых слоў няма

 

Апісаць твой вобраз,

Хараство, спакой –

Толькі ў цябе ўнікнеш

Чуткаю душой.

 

[1909]


[1909]

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910