Паднята заслона — спектакль у Жэневе...
Ў пачатку імша —
Святыя падаткі Богу, Хрысту, Дзеве
Нясе іх душа...
Разбойнікі ў тогах апосталаў міру...
Эй, справа нячыста!
Мы ведаем добра маэстра-вампіра,
Тардʼе-пацыфіста!
За ім, як сабачкі — спрытнягі таксама,—
Паны і баяры.
На іх «святых» тогах крывавыя плямы.
А хто іх ахвяры?
Мы ведаем, панска-баярскія справы —
Вяроўкі, расстрэлы.
Завошта? Спытайце, жэнеўскія лавы,
Паноў азвярэлых!
Гэтыя спецы з нажамі ў халявах
Талкуюць аб згодзе!
Талкуюць для віду, а шэпчуць аб справах
Вайне і паходзе...
Грымяць у Маньчжурыі танкі, гарматы,
Гудуць бамбавозы.
Зноў пушчаны ў дзела ручныя гранаты,
Дум-дум і шымозы.
Жандараў сусветных драпежная зграя
Рве й дзеліць Кітай...
Вось пакты Келога, а песня старая:
Рэж, граб, рві і хватай!
А Ліга народаў, славутая Ліга...
Утупіла вочы...
Эх, ведае, чуе, старая выжыга,
Рух, поступ рабочы!..
Даволі камедый, апосталы міру,
Паны-пацыфісты:
Маэстры вайны, крыважэрцы-вампіры,
І план ваш празрысты!
Але памятайце, адпетыя джэкі:
Вас сочыць расплата!
Прыпомніцца грэх ваш, замахі і здзекі
І роль ваша ка́та!
20/ІІ 1932