БЕЛАРУСКАЯ ПАЛІЧКА

Пагуляў на волі

Вецер лёгкакрылы,

Пагуляў і будзе:

Адпачынь, пахілы!

Паламаў ты лесу,

Стрэх сарваў нямала,

З хмарамі і з громам

Спрэчку вёў, бывала.

Рваўся ты ў прасторы,

  Ў стэп шырокі, сіні,

Ды закалыхалі

Ветрыка пустыні...

Што ж, уляжся, вецер,

Хоць ў чужой даліне,

Бо ці не ўсё роўна,

Дзе цябе ні кіне

Доля бедачына,

Мачыха ліхая,

Бо не маеш, браце,

  Свайго роду, краю...

Пагуляў на волі

Вецер лёгкакрылы,

Пагуляў, улёгся

І заснуў, пахілы.