epub
 
падключыць
слоўнікі

Якуб Колас

Панская ласка

Да працэсу над «Грамадой»

 

За вашу «ласку» панскую,

Палітыку шатанскую

Мы дзякуем, паны!

«Дабра» зрабілі многа вы,

Залезшы ў наша логава,

Пабраўшы бізуны.

Наслалі нам асаднікаў,

Жандараў і ураднікаў,

І іншае брыды.

Кунтушыкаў, каптурыкаў

І антэкаў-мазурыкаў

Наперлі нам сюды,

Каб гэтыя «дабродзеі»

Вам польскасць тут праводзілі

На панскія лады.

І «польскасць» тут праводзіцца —

На ўвесь наш край смуродзіцца

Ксяндзоўская мана.

І веру каталіцкую

Падносяць нам і тыцкаюць,—

На чорта нам яна?

Не возьмеш нас касцёламі,

Царквамі і саборамі —

На ліха нам ваш рай!

Гандлюйце сабе душамі,

Як рэдзькаю ці грушамі,

А нас ты не чапай!

Ды ліха ў тым, каханыя,

Што вы прыйшлі нязваныя,

Убіліся ў наш край,

Зрабілі яго «крэсамі»

І разам з пэ-пэ-эсамі

Заслалі тут абрус.

Ад Піншчыны да Случчыны

Пад пятамі пілсудчыны

Гаруе беларус.

Няма яму аддушыны,

А крык яго прыдушаны

Ўзвялі вы ў крымінал!..

Паны! Ці ж мелі рацыю

Судзіць за крык той нацыю,

Упасці ў такі шал?

Рэкорд, паны, пабілі вы,

І як тут ні адвілівай,

А роўных вам няма.

І тактыку ксяндзоўскую,

І школу мураўёўскую

Прайшлі вы недарма.

 

[1928]


[1928]

Тэкст падаецца паводле выдання: Колас, Я. Збор твораў: у 20 т. Т. 2 : Вершы 1911―1938