Вялік разгон,
Шырок размах
Нястрымнай гулкай хвалі.
Мы ў плынях дзён
Праводзім шлях
У сонечныя далі.
І што ні год
Гучней паток
Імкне пад сцяг чырвоны,
Смялее ўзлёт,
Цвярдзее крок —
Ідуць, ідуць калоны.
Вядзе на бой
Іх наш стратэг,
Маяк наш, слаўны Сталін.
Шуміць гразой
Ён, наш разбег,
Імклівасць творчай хвалі.
Глядзім мы ў даль,
У шыр пуцін
Без страху, без трывогі:
Краіна — сталь,
Акорд машын, —
То песня перамогі.
А ўсцяж граніц
Стаіць скала
Байцоў чырвонай раці.
Агні зарніц,
Узрок арла —
Ахова нашай працы.
Прайшла яна
Праз громы, дым
І ворагаў скрышыла.
Вайне — вайна.
Жыві, наш Клім,
Наш маршал Варашылаў!
Вялік разгон,
Шырок размах
Імклівай творчай хвалі.
У яснасць дзён
Праложым шлях.
Вядзі ж нас, мудры Сталін!
24/Х 1935