На ўсход, у Крэмль, у новы свет,
Раскрыўшы аканіцы,
Мы шлём табе, Масква, прывет
З заходняе граніцы.
Ты — сцяг нашай сілы,
Ты — волі прастор,
Палёт быстракрылы
Да сонца і зор.
Ад гарадоў, калгасных ніў,
Ад кожнае святліцы
Прымі, Масква, сардэц парыў,
Як шум жывой крыніцы.
Ты — сцяг нашай сілы,
Ты — дружбы прастор,
Палёт быстракрылы
Да сонца і зор.
Агням тваім, што над Крамлём
Гараць, як зараніцы,
Вянкі багатыя саўём
Мы з жыта і пшаніцы.
Ты — сцяг нашай сілы,
Ты — славы прастор,
Палёт быстракрылы
Да сонца і зор.
Агні твае плывуць у свет,
Няма для іх граніцы;
Гараць яны, як яснацвет,
Як светлыя дзянніцы.
Ты — сцяг нашай сілы,
Ты — шчасця прастор,
Палёт быстракрылы
Да сонца і зор.
Жыві, Масква, — на ўвесь сусвет
Струмень святла крыніцы!
Мы шлём табе, сястра, прывет
Ад роднае сястрыцы.
Ты — сцяг нашай сілы,
Ты — праўды прастор,
Палёт быстракрылы
Да сонца і зор.
31/ІІІ 1939