* * *
Рана вам журыцца,
Думкі, сэрца дзеткі,
Рана вы завялі,
Веснавыя кветкі!
Ці мароз знячэўку
Вас прыбіў вясною,
Як на сцежку жыцця
З простаю душою
Стаў я, поўны веры,
Радасці і сілы?
Што ж на вас дыхнула
Холадам магілы?
Што ж вы неспакойна
Кружыцесь, як пчолы?
Думкі, мае думкі!
Што вы невясёлы?
Ці краіны роднай
Балаты гнілыя
Смуткам вас акрылі,
Думкі маладыя?
Ці вас песня-жальба,
Думкі, ўзгадавала?
Ці людское гора
Ў лесе вас спаткала?
Ці маё так жыцце
Склалася няўдала?
Ці мая дарога
Ў туманы папала?
Рана спахмурнелі,
Думкі маладыя,
Рана вы завялі,
Кветкі веснавыя!
[1909]