epub
 
падключыць
слоўнікі

Якуб Колас

Раніца вясною

Ціха ў полі, ціха ў лесе,

А ні шэпне вецярок,

Толькі дзесь у паднябессі

Льецца звонкі галасок.

 

Як бы срэбраны званочак,

Роніць ўніз за трэлем трэль,

Аж заслухаўся гаёчак,

Не парушыцца і ель.

 

На усходзе бляск агністы

Літым золатам дрыжыць;

Слуп высокі, прамяністы

Роўным полымем гарыць.

 

Тонкіх хмарак валаконцы

Сталі хораша ў радок,

Як бы ўюць яны для сонца

З тых валоканцаў вянок.

 

Ціха ў полі, ціха ў лесе,

Чуць балбоча ручаёк,

А высока ў паднябессі

    Льецца звонкі галасок.

 

7/І 1910


07.01.1910

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910