epub
 
падключыць
слоўнікі

Якуб Колас

С. Гарадзецкаму

(Пры ўручэнні дубовага кія)

Я хадзіў па лесе, дружа,

Па дубовым лесе.

Павучкі снавалі кужаль

На дубовай стрэсе.

Дол укрыла жоўтым лісцем

Восеньская сцюжа.

Як прыемна па ім брысці,

Каб ты ведаў, дружа!

 

Аглядаў я лесу сховы,

        Як ляснік дасужы,

Выбіраў я кій дубовы

Для цябе, мой дружа!

 

Кій — апора і падмога

І хады аружжа.

Не судзі ж яго ты строга,

Хоць ён і няўклюжы.

 

Дык няхай ён праўдай-верай

        Доўга табе служыць,

Многа ясных сцежак змерай

        З гэтым кіем, дружа!

 

Вузкае

25/ХІ 1944


25.11.1944

Тэкст падаецца паводле выдання: Якуб Колас. Т. 3 : Вершы, 1939―1945