epub
 
падключыць
слоўнікі

Якуб Колас

С. С.

Усё, што поўніла мне сэрца,

Усё, што думаў і чым жыў,

Табе запісваў на паперцы,

Як самы шчыры свой парыў.

 

І голас мой, сумоты поўны,

Пачула ты ў астатні час,

І, можа быць, цішком, бязмоўна

Сама ўздыхнула ты не раз.

 

І тыя думы, тыя песні,

Што ты радзіла для мяне,

З пачуццем юнага прадвесня

Сама складала ўпатайне.

 

І мне яны цяпер так мілы,

І для мяне ў іх шмат красы,

Бо нейкі подых лёгкакрылы

Злучыў тут нашы галасы.

 

<гасцініца> Масква, <№> 918

18/ХІ 1945


18.11.1945

Тэкст падаецца паводле выдання: Якуб Колас. Т. 3 : Вершы, 1939―1945