epub
 
падключыць
слоўнікі

Якуб Колас

Салюты Масквы

Як голас прадвесня, як гімн вызвалення,

Расходзяцца гукі маскоўскіх салютаў,

У прах рассыпаюцца Гітлера звенні,

На захад свой цёмны адпоўзваюць спруты.

 

Удар за ударам, як біч бліскавіцы,

Шаломяць і слепяць фашысцкага ката.

Канвульсія зводзіць мурло крывапіўцы,

І стукае ў вокны баронаў адплата.

 

Варожую крэпасць, як глыбіну лёду,

Чырвонаармейская сіла згінае.

Байцы, камандзіры! Вы — гордасць народа,

І любасць народаў над вамі лунае.

 

Наперад, наперад, савецкія раці!

Ганіце іх, вылюдкаў, к чортавай маці:

Вас сёстры чакаюць і жонкі, і маці,

І мілыя вашы ў фашысцкай няволі.

  Наперад, наперад, Суворава ўнукі,

Жалезным патокам, сталёваю лавай!

Вядуць вас надзейныя, цвёрдыя рукі, —

Вярхоўнаму маршалу Сталіну слава!

 

13/ІХ 1943


13.09.1943

Тэкст падаецца паводле выдання: Якуб Колас. Т. 3 : Вершы, 1939―1945