Цвёрды крок жалезнай волі
След пакінуў, як ніколі,
Ў гэты слаўны год.
Бальшавіцкаму напору
Паддаліся скалы, горы
І паўночны лёд.
Гэтай воляй і стыхія
Ў берагі ўвайшла другія:
Рэкі, вадаспад
Намаганнем тым геройскім
Па канале Беламорскім
Пацяклі назад.
У пустэлях Каракума
Гімны пеў маторным шумам
Караван аўто.
То не людзі, а тытаны,
Зразумелі, кім пазваны
Біцца і за што.
І глыбіні стратасферы
Бальшавіцкі розум змераў,
Як ніхто нідзе.
Творчай воляй камуністаў
Шлях праложаны агністы
Вольнай грамадзе.
Днепрабуд, Магнітастроі...
Слава, гонар вам, героі!..
Вораг, чуй, зважай!
Шлях шырокі ў свет адкрыты.
Дык красуйся і жыві ты,
Наш Савецкі край!
[1933]