epub
 
падключыць
слоўнікі

Якуб Колас

Сябрам

Гэй, сябры мае!

Дзе вы, родныя?

Віхры лютыя,

Непагодныя

 

Разагналі вас

Ва ўсе стораны,

І дарогі вам

Пазавораны.

 

Сцежкі вузкія

Палыном зраслі,

І нічога вам

Не відно ўдалі.

Няма хат у вас,

Ні вуглоў сваіх,

І змоўк голас ваш,

І ваш смех заціх.

 

А за што, за што

Ганьбу вам далі?

За што гоняць вас

Прэч з свае зямлі?

 

Эх, сябры-браты!

Самі знаеце:

Агню палкага

Іскры маеце.

 

Не тушэце ж вы

Той агонь святы,

Асвятляйце ім

Родны край, куты...

 

Што ж? Няхай віхры

Надрываюцца,

Няхай ворагі

Насміхаюцца.

 

Хоць на дзераве

Зжоўкла ўся ліства, –

Вясна вернецца,

Адрасце трава.

 

Менскі астрог,

10/Х 1908


10.10.1908

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910