epub
 
падключыць
слоўнікі

Якуб Колас

Сябрам

Ой, сябры мае вы, мілы,

Дзе цяпер вы, дарагія?

Ці схавалі свае сілы?

Ці ёсць думкі маладыя?

 

Тыя думкі, тыя мыслі,

Што душу нам хвалявалі,

З-за каторых хмары звіслі,

За што з нівы нас сарвалі?

 

Нас з народнай ціхай нівы

Разагналі па ўсім свеце...

Ці здаровы вы, ці жывы?

Дзе вы, мілыя? Гукнеце!

 

Ці збяромся зноў калі мы

Ў нашым бедным родным краі,

Як бы птушкі пасля зімы?

Дзе вы, хлопцы? Я гукаю!

 

Не, няпраўда! Быць не можа,

Каб не грэла цёпла сонца.

Наша праўда нам паможа –

Блісне нам святло ў аконца!

 

[1907]


[1907]

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910