epub
 
падключыць
слоўнікі

Якуб Колас

Вячэрнія хмаркі

Сонейка заходзіць,

І кладуцца цені,

І плывуць хмурынкі

Ў ціхім задуменні.

 

Белыя валокны

Сонейкам заліты.

Вольны ім дарогі,

Сцежкі ім адкрыты.

 

Хмаркі залатыя!

Вы — прастору дзеці,

Ходзіце вы вечна

Па ўсім белым свеце.

 

Праплывіце ж, хмаркі,

І над родным краем,

Над сялянскім полем,

Над зялёным гаем,

 

І заплачце, хмаркі,

Дробнымі слязамі

Над мужычай нівай,

  Над яго лугамі.

 

Загрымеце громам,

Стаўшы цёмнай хмурай.

Толькі ж не пабеце

Жыта градам, бурай.

 

Хмаркі залатыя,

Сонца, неба дзеці!

Вы прывет мой шчыры

Ў вёску занясеце.

 

[1910]


[1910]

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910