epub
 
падключыць
слоўнікі

Якуб Колас

Вярбіна

Над вадою адзінютка

Пахілілася вярбіна;

Ные бедная ціхутка.

Ці ж то ёсць у ёй кручына?

 

Мые Нёман ёй карэнні,

І дурэе вецер з ёю,

А паднізам чарадою

Ціснуць ногі ёй каменні.

 

Ёсць кручына немалая,

  І шуміць яна так нудна,

Бо ёй доля не спрыяе,

Бо расці ў каменнях трудна..

 

Так і ты, народ наш бедны,

Як вярбіна, проці волі

Доўга носіш пояс медны,

Гнешся ты, як крыж у полі!

 

[1909]


[1909]

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910