epub
 
падключыць
слоўнікі

Якуб Колас

Вечар на Палессі

(Са зборніка «Другое чытанне для дзяцей беларусаў»)

Вось пастух ўжо стадка гоніць;

Вол бушуе і раве.

Вёска ходзіць і гамоніць,

Толькі рэха ў лесе йдзе.

 

З комін дым падняўся ўгору;

Люд сцякаецца з работ...

Эх, люблю я гэту пору,

Як з палёў ідзе народ!

 

 

Мне іх песні сэрцу мілы,

Хоць і многа ў іх нуды.

Некісь жаль казыча жылы,

Як заграюць дудары.

 

Свіст за свістам так і льецца,

Як Палессе, без канца;

Як хто плача, мне здаецца,

Як сляза цячэ з ліца.

 

А сабакі ім ўтуруюць...

Дудка плача, дудка мрэ...

Як ніколі не гаруюць,

Як бяда іх не бярэ!

 

1906–1907


1906-1907

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910