Ці то сон быў, ці то мары,
Ці то было з намі?
Наплывалі ў небе хмары,
І гулі грамамі,
І паволі над балотам
Крылле разнімалі,
І магутным цяжкім лётам
Небакрай займалі.
А над імі так ласкава
Сонейка зіяла,
Ўсё вясною малажава,
Гожа выглядала.
Мы сядзелі, нам спявалі
Нашых думак роі,
І над намі сакаталі,
Гаманілі хвоі.
Ці то сон быў, ці то чары,
Падарункі мая?
Ці то нам складала мары
Сіла маладая?
[1915]