epub
 
падключыць
слоўнікі

Якуб Колас

Забыць не магу

А. Я.-К.

Я хворы, нядужы, прыкован к пасцелі,

Зачынен мне свет,

Няўжо мае песні і дні адшумелі,

І сам я адпет?

 

У пару клятушак прастор мой замкнёны,

Спыніўся мой воз.

Халодныя шыбы, як дзед утрапёны,

Заткаў мне мароз.

 

І бачу я цьмяна, як гойдаюць хвоі

                Тканіну галін...

Дык як жа ты будзеш у добрым настроі?

Адзін ты, адзін...

 

Ляжу ці сяджу я, ці проста шнурую,

Як воўк у смугу.

Забыць жа Былінку, дружачку старую,

Ніяк не магу.

 

І ўсюды ж, усюды і заўжды я з ёю –

І ў яве і ў сне...

Ці помніш, Былінка, будзь шчырай са мною,

                І ты аба мне?

 

25/ХІІ 1947


25.12.1947

Тэкст падаецца паводле выдання: Якуб Колас. Т. 4