epub
 
падключыць
слоўнікі

Янка Купала

1914-ты

Сыходзіш ты туды, скуль не прыходзяць,

Але сваіх не забярэш слядоў...

О год! такіх, як ты, час рэдка родзіць,

О год! ты першы гэткі з між гадоў.

 

Прыйшоў не з згоды і свабоды весцяй

І — не ўзвялічыць праўду між людзьмі,—

Жыццё мільёнаў ты прыйшоў затрэсці,

Шлях вымасціць свой трупамі, касцьмі.

 

Кастлявай зморай з гібелі сталеццяў

Ты, як пракляцце, будзеш вызіраць,

І будзе маці страшыць табой дзеці,

Ды клікаць той — хто ўздумае ўміраць.

 

«Не забіваці» — ты стрывожыў права,

На сэрца і душу наклікаў цьму;

Людзей на звераў пошасцяй крывавай

Ператварыў і здаў наследніку свайму.

 

Га! Хай жа льецца кроў, дымяць пажары,

Няхай пад крыжам плача сірата!

Крывавы бог крывавыя ахвяры

Сабраць павінен з свету дачыста.

 

Аж прыйдзе іншы год з рукою лёгкай

Агледзіны рабіці новых дзён,

Дзе меч нявідзімага Бога-рока

Напіша бескрывавы свой закон.

1914


1914

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан