epub
 
Падключыць
слоўнікі

Янка Купала

А ты, браце, спі!

Вясна. Сонца узыходзе,

Свеце на зямлі;

Дух збудзіўся у народзе,—

Усталі, пайшлі.

 

Ёсць і працы, ёсць і поту,—

Спаць няма калі!

Дружна валяць на работу,—

А ты, браце, спі!..

 

Спі, на слёзы і на гора

Рукою махай;

Хоць зрабіў бы ты з іх мора,

А кажы: няхай!

 

Няхай тыя уставаюць

Рана да зары,

Што свабодачку кахаюць!—

А ты, браце, спі!..

 

Недастатак госце ў хаце,

З крыўдаў дух замёр;

Дзеці, жонка шлюць пракляцце...

Ты ж, як той тапор!

 

Дрэмле сошка, і адлогам

Шнур ляжыць даўгі;

Ржа касу есць над парогам...

А ты, браце, спі!

 

Спі, а можа, хто заблудзе

У твой бедны край

І цябе з душой разбудзе,—

Крыкне: «Уставай!»

 

Ты на гоман той народны

Паходню бяры

І другіх будзі з паходняй!..

А мо лепей... спі?!

 

[1905-1907]


[1905-1907]

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com