epub
 
Падключыць
слоўнікі

Янка Купала

Бай

Бегаў бай па сцяне

У чырвоным кафтане.

Байку баіў. Ай, лю-лі!

Жылі пчолкі у вуллі...

Баіць ці не?

— Баіць!

 

Бегаў бай па сцяне...

Шла вясна па вясне,

Жылі пчолкі з году ў год...

Бралі ў соты з кветак мёд...

Баіць ці не?

— Баіць!

 

Бегаў бай па сцяне...

Ніхто пчолак не кране;

Самі мёд збіраюць той,

Самі ласваюць зімой...

Баіць ці не?

— Баіць!

 

Бегаў бай па сцяне...

У той самай старане

Пустапасам труцень жыў,

Неяк з пчолкамі здружыў...

Баіць ці не?

— Баіць!

 

Бегаў бай па сцяне...

Труцень кажа: «Дайце мне

Глянуць, пчолкі, у вуллёк,

Паспытаці ваш мядок!..»

Баіць ці не?

— Баіць!

 

Бегаў бай па сцяне...

Ці так добра, ці так не,—

Пчолкі добрымі былі,

Трутня ў госці прынялі...

Баіць ці не?

— Баіць!

 

Бегаў бай па сцяне...

Труцень пальцам не кіўне:

Пчолкі мёд нясуць да сот,

Труцень есць ды есць той мёд.

Баіць ці не?

— Не!

 

1921


1921

Тэкст падаецца паводле выдання: Янка Купала. Поўны збор твораў. У 9 т. - Т.4. Вершы, пераклады 1915 -1929. - Мн.: Маст. літ., 1997. - 446 с., [4] л. іл.
Крыніца: скан

Беларуская Палічка: http://knihi.com