epub
 
Падключыць
слоўнікі

Янка Купала

Беларускія сыны

Па беларускім бітым шляху,

Б’ючы ў кайданавы званы,

Брыдзе чужынец, а з ім побач

Хто?

— Беларускія сыны!

 

У беларускім вольным краі,

З ярэмнай збрыўшы стараны,

Царыць чужынец, а ў паслугах

Хто?

— Беларускія сыны!

 

Над беларускай беднай хатай,

Як полка вырвана з труны,

Вісіць чужы сцяг, а трымае

Хто?

— Беларускія сыны!

 

У Беларусі спеў чужацкі,

Як над касцямі груганы,

Крумцяць чужынцы, а іх складам

Хто?

— Беларускія сыны!

 

На беларускім буйным полі

З вясны да новае вясны

Растуць крыжы, а пад крыжамі

Хто?

— Беларускія сыны!

 

1919


1919

Тэкст падаецца паводле выдання: Янка Купала. Поўны збор твораў. У 9 т. - Т.4. Вершы, пераклады 1915 -1929. - Мн.: Маст. літ., 1997. - 446 с., [4] л. іл.
Крыніца: скан

Беларуская Палічка: http://knihi.com