epub
 
Падключыць
слоўнікі

Янка Купала

Было гэта...

Было гэта вясною,

Клаў гняздо верабейка;

На лугу на зялёным

Шчасна йграла жалейка.

 

Было гэта улетку,

Шукаў зёрн верабейка;

Хмары з громам стагналі,

Нудна пела жалейка.

 

Было гэта увосень,

Гнаў каршун верабейку;

На слаце-непагодзе

Галасіла жалейка.

 

Было гэта зімою,

Мёр, замёр верабейка;

Лягла ў снежныя гурбы

Паламанай жалейка...

[1909]


[1909]

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан

Беларуская Палічка: http://knihi.com