epub
 
Падключыць
слоўнікі

Янка Купала

Быў гэта сон...

Быў гэта толькі сумны сон

Душы расплаканай маей,

Што сярод бледных будных дзён

Я свята меў, глядзеў святлей.

 

Быў гэта толькі сумны сон,

Што у вачах яе скрозь смех

Чытаў святы сабе закон

Кахання шчырага і ўцех.

 

Быў гэта толькі сумны сон,

Што вось інакшая яна

І пойме болю майго стогн,

Зірне ў душу маю да дна.

 

Быў гэта толькі сумны сон,

Што развяду я з ёй бяду,

Што пад яе напеваў звон

Лягчэй к магіле дабрыду.

 

Ўсё для мяне быў гэта сон;

Хтось іншы яву меў ў жыцці,—

Ён ёй і мне стварыў прыгон,

А сам сышоў, каб... не прыйсці!

 

1915




Беларуская Палічка: http://knihi.com