epub
 
Падключыць
слоўнікі

Янка Купала

Хай жа вам так не здаецца...

Хай жа вам так не здаецца,

Што бяда ўжо і зацісне.

Знайце, ліха ператрэцца

І маланкай доля блісне.

 

Праўда, поўны сумаў весці

Буйны вецер нам прыносіць,

Што як з гора, як з балесці

Каля нашых хат галосіць —

 

І галосіць, і заводзе,

Плача, як па дзетках маці,

Аж бы крыкнуў: годзе, годзе!

Годзе сэрца жалем рваці!

 

Але ўсё ж, хай не здаецца,

Што бяда ўжо і зацісне,—

Наша ліха ператрэцца,

І маланкай доля блісне.

1906


1906

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com