БЕЛАРУСКАЯ ПАЛІЧКА

Янка Купала

Ці ж гэта многа?!

Ад свету, ад Бога

Жадаю нямнога:

 

Зямелькі з валоку,

К ёй шнур неўдалёку,

З святлічкай хацінку,

За жонку дзяўчынку,

Кусок салца к хлебу,

Рубля на патрэбу,

Здароўя чым болей,

Крыху долі, волі —

 

І ўсё! больш нічога...

Ну, ці ж гэта многа?!

 

[1907]

[1907]

---

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан