epub
 
Падключыць
слоўнікі

Янка Купала

Чужым

Мы вас прынялі хлебам і соляй,

Людзі чужыя;

Ўстрэлі вас ласкай нашага поля

Кветкі жывыя.

 

Нашы сасонкі шумнага бору

Далі вам хаты,

Далі загонаў нашых разоры

Гонар багаты.

 

Пух і аўчынкі нашага хову

Грэлі зімою.

Птушкі вам гралі з нашай дубровы

Гімны вясною.

 

Ценем тулілі вас у спякоту

Нашы чарэсні,

Нашыя жнейкі ў жніўну работу

Пелі вам песні.

 

Вашым патомкам нашыя маткі

Казкі складалі:

Ў сэрцах дзіцячых праўдаў пачаткі

Сеў засявалі.

 

Верны славянскім спадкам, браточна

Ў госцях вас мелі,

І шанавалі людска, святочна

Ў будні, ў нядзелі,

........................................

Сотні лет песцім днямі і ночай

Госця на шыі —

Змея, што з пуняў скарбы валоча,

Скарбы чужыя.

 

Вы ўжо забылі, людзі здарэння,

Дзе ваш прыпынак,—

Вывелі ў гандаль славу, сумленне —

Праўду на рынак.

 

Слепа зракліся сораму, ўвагі,

Ў хорамы селі,—

Браццям жа ўздзелі лапці, сярмягі,

Торбы надзелі...

 

Людзі чужыя! Хтось калісь зліча

Вашу нам шкоду:

Зліча праступкі... к суду пакліча

Крыўда народу.

 

[1906-1912]




Беларуская Палічка: http://knihi.com