epub
 
Падключыць
слоўнікі

Янка Купала

Да дзяўчатак

Ой, дзевачкі, любанькі!

Люблю, люблю вас,

Я ў вашых, галубанькі,

Сетачках увяз.

 

Ох, мае вы сонейкі,

Не знаю, з чаго

Не мілы мне гонейкі

Шнурочка майго.

 

Не мілы мне хатачкі

Родненькай куток,

Не мілы мне матачкі

Слоўцы: «мой сынок»!

 

Не міла, як волікаў

Рог забушаваў;

Ой, ой, для саколіка

Час благі настаў!

 

Сэрца б’ецца, корчыцца,

Кроў пайшла гуляць,

Днём рабіць не хочацца,

А ночкаю — спаць.

 

Нападае часценька

Нейка дзіўна млось,

І так шчасна-шчасненька

Хочацца чагось.

 

Вочы неўспадзевачкі

Ўсё туды бягуць,

Дзе сонейкі-дзевачкі,

Любачкі жывуць.

 

Ой, ой, не ў цікавую

Сетку, знаць, забрыў,

Хоць бы з добрай славаю

Ўжо яе пазбыў.

 

Голуб, як з галубкаю,

Весела вурчыць;

Пэўна хлопцу з любкаю

Лепей, як так, жыць.

 

Бачу, так здаваецца,

Што мне, бедаку,

Таго штось жадаецца,

Чаго й галубку.

 

Адну ненаглядачку

За жонку вазьму,

Тады, можа, радачку

Дам гору свайму.

 

Тругі, тругі, трубачкі!

Грайце ў добры час;

Дзевачкі-галубачкі,

Люблю, люблю вас!

 

[1905-1907]


[1905-1907]

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com